nga-ruuapp

pagéto teu jiga baréto
baréto leuwih lawas ti kamari
baréto ukur jadi saksi
baréto moal bisa balik jadi kiwari
tetep bihari!

suwwérrr
lain rek nyawér
ukur hayang ngajéwér
lampah runtah nu awuntah

summmpahhh
lain niat nyacampah
diusahakeun moal gagabah
ngajéwér laku runtah nu ngadabah rucah

tapi euy..
geuning hese ngaroroés hayang bérés téh
di gagamah waé jalma saésé
nu békingna sakadang adikawasa jagat
beulah kulon!

susah!

cikal!

harita...
beulah wétan
panonpoé meujeuhna tibra
ngarikeun bulan nyorang buruan,
caang mabra meupeus keyang
mun beurang kasilih siang
ngan teu wani sorangan
mega pias dikiceupan béntang
marengan dina petengna peuting

tonggérét ti tadi jempé
ampih dina reumbeuyna daun
ninggalkeun jangkrik ngajerit
ditembalan goak caricangkas kueuk bueuk
meupeus simpé ngareungat jempé
janari tangéh kénéh
karék liwat reureuh kolot
nu nyeugrék ka jero pangimpén
teu kawawa bawana jurig tunduh
ngagurayot muntangan bulu panon

kuduna mah... ngan

di hiji imah pulas héjo
lalaki jangkung leutik ngaléjég
teu geunah cicing
sora awéwé ngaharegung
nahan kanyeuri semu gumbira
nahan kapeurih nunggu kasuka
cimata ngalembereh maseuhan hideungna biwir panon
késang renung jibrug salaput awak
...teu kaciri sedih
nu aya gurat imut ngagudat rupa
nu dianti baris ngajadi
bukti munggaran jangkepna ngarabi

00.00
denger!

april 04

sulaya

geleger.. geleger
panggero ti lembur!
najan leuleuy angger handaruan
najan kabareng ku imut tapi tetep nyérédét
tapi naha haté nagen lir teasna batu dibanjur wahangan?

"jang geura solat!... geura diajar puasa senén kemis!, tahajud jeung duha!..."

haté tetep murengked... sirah ngaheueuhkeun bari jeung sulaya

téga!

maret, 13 4.46

banjar asih

jauh.....
pamohalan kasorang deukeut deukeut
terminal jauh kénéh
tungtung katuhu can katénjo

banjar..
jiga karék kaluar ti kénca
asa lila tapi deukeut kénéh
ka tungtung kiwa

asih...
can wae nembongan
seungitna can kaambeu
boro jentul boro rigig

cape...
nu aya ukur merul kakeuheul
geuning tangéhna teu kira-kira
nyorang hirup saumur dunya

leuleus...
mun liat onaman
ieu mah rampohpoy
tanaga béak uteuk ngagelentong


enggeusan...
bongkokan wae kitu?
asana mah leuwih gampang
teu kudu ngurusanan raga
teu kudu nyimbeuhan jiwa

hirup...
ukur nyorang
bari beberengkes bari bubuntel
bebekelan salaput raga

paéh...
ukur ditungguan teu diharepkeun
najan kadang cangcaya
naha engké...

hirup deui!!

jigana (baheula)

tangkal héjo ngémploh, rada kerep
walungan ngocor...
cikarae cir, cibala cor
gunung jeung pasir teu buligir,
maraké dibaju
balukbuk héjo, barunyampay ngémploh

tapi can nanya!


kedoya, tungtung taun 1426 H

pulsa

salah jigana mah
eh bener kétang salah
lain jigana

jangji tinggal jangji
pulsa dieusi isukan
tapi naha geuning diapilainkeun
dianggap teu penting?

rumasa ngan bisa rumasa
tambélar taya karep!!


kedoya, tungtung taun 1426 H

banjarasih

rembet!!!
pucuk eurih
haréndong
sésa tangkal entéh
sésa kebon médé
sésa haramay
séréh, teki jujukutan
nyakseni!!

pilembureun anyar
ngawangun julang ngapak
ngujur ngulon ngétan
geusan ganti nu heubeul
nu ruksak kaurug lemah
cinangsi, tinggal sari
narikolot!

mimiti sabaraha siki
dituturkeun sapiriumpi
beubeunah tumaninah
barunyampay béh kidul
balukbuk béh kalér
ngajegir!!!

ceug... iteuk nanceub
di kampung deudeuh
tempat reureuh
silih simbeuh jeung beubeureuh
silih bagi kaasih
banjarasih!


kedoya, tungtung taun 1426 H